الأربعاء، 24 أبريل 2019

تنظيم الوقت في رمضان 2019 - روتيني الرمضاني


السلام عليكم ورحمه الله وبركاته 

اليوم بكتب لكم طريقتي في تنظيم الوقت في رمضان
سبحان الله الوقت في رمضان على طوول يمشي فلازم يكون عندك جدول رمضاني تمشين عليه ولا بيطير ما استفديتي


رمضان

روتيني في شهر رمضان 

- انا اجهز الإفطار الساعه 1 الفجر يعني بوقت اعداد السحور
اجهز الطبخه بهالوقت فإذا مثلا بسوي فطائر اعجن العجينة واجهز الحشوة وكل شي اجهزة واحطة في الثلاجة واذا جاء بكرة قبل السحور بساعه اشكل العجينة واحشيها وادخلها الفرن
وهالكلام بعد ينطبق على الشوربة اطبخها واحطها في الثلاجة قبل الافطار بنص ساعه اسخنها
( السمبوسة- جيب التاجر بالتوست - المكرونة اسلقها - اسوي بشاميل - اسوي حشوة المكرونة ) كلها اجهزها تجهيز مسبق
ليش اسوي كذا لاني ماحب اطبخ وانا صايمه احس بالعطش
وايضا علشاني احب قبل الاذان بنص ساعه الاقي كل شي جاهز واجلس اذكر الله واستغفر وادعي ماحب تروح اخر ساعه صيام وانا اطبخ

- بعدها السحور الساعه 3 تقريبا حاجة سريعه وخفيفة تمر ولبن او شابورة واحيانا اكل كبسة

- بعدين ياذن الفجر واصلي واجلس اذكر الله إلى ان تشرق الشمس
- بعد شروق الشمس اسوي رياضة لمدة نص ساعه هذا هو الوقت الي اقدر اسوي فيه رياضة
- بعدها انام إلى الساعه 2 الظهر واحيانا 3

- اصحى واجلس اقرأ قرآن
- الساعه 4 ونص تقريبا ادخل المطبخ اكمل الطبخات الي كنت مجهزتها في اليوم السابق
*جربوا طريقة التجهيز المسبق ممتازه

- بعد الإفطار يبداء غسيل المواعين وتنظيف المطبخ

نصيحة اشتري صحون و اكواب بلاستيكية للإستخدام الواحد بتوفر عليك وقت كثير خاصة اذا كنتوا عائله كبيرة في البيت 

- بعد صلاة التراويح هذا وقت العائلة اشتروا العاب ورقية والعبوا

بتلاقون الالعاب في مكتبة جرير كل رمضان اشتري لعبة ونلعب
مرة ننبسط وتغيير عن الايام العادية واحسن لكم حتى من مشاهدة التلفزون 

- الساعه 12 هذا وقت العناية
احط ماسك على شعري لمدة نص ساعه فقط بعدها استحم و ارطب جسمي



نصيحة قللي عزايم واذا لابد منها مرة في الاسبوع تكفي العزايم تضيع الوقت جدا يروح اليوم وانتي معزومة او في مطبخك لانك عازمة

توفير اكثر للوقت جهزي قبل رمضان حشوة سادة يعني سوي عصاج لحم - او - دجاج ماتحطين فيه اي نكهات بينفعك كثير ويوفر عليك وقت تحطينة في الفريزر
تقدرين تستخدمينة في السمبوسة والفطائر والمكرونات والسندوتشات ....

و الله يبلغنا رمضان لا فاقدين ولا مفقودين
هذا هو روتيني الرمضاني

قولوا لي انتوا ايش روتينكم

هناك تعليقان (2):

  1. ممكن تحسي بالعطش لان تسوي رياضتك الصباح
    جدول جميل بالتوفيق يارب ومبارك عليك الشهر

    ردحذف
    الردود
    1. اكون متسحرة وشاربة ماء كفاية فما الحق اني اعطش
      الله يبارك فيك ويبغلك الشهر

      حذف