الاثنين، 11 يونيو 2012

حلا الزبادي


(السلام عليكم ورحمه الله وبركاته)
اليوم ان شاء الله ببداء اول تدوينه مطبخيه 
وهالحلا هو اول حلا تعلمته  واحبه موووووت حتى طريقتة سهله 
نبداء بالمقادير 

الطبقة الاولى / 
1 ونص باكت بسكوت شاي تطحنين ناعم 
ربع اصبع زبده 
نص علبه قيمر او قشطة 

الطبقة الثانيه / 
علبتين زبادي 
5 فناجيل حليب بودره 
فنجالين سكر او حسب الرغبه فنجالين يعطيك تحليه متوسطة

الطبقة الاخيره /
اثنين كريم كراميل < نسيت اصور اثنين 
كاس ونص ماء 

للتزيين /
سمسميه اولكر << حنا نسمين كذا بسكوت سمسم عاد هذا شكله للي ما يعرفه 

نجي اللحين للطريـقة /
1- نطحن بسكوت الشاي طحن ناعم 
2-نخلطة مع ( الزبده-والقيمر ) 
3-يكون قوامه مثل كذا 

4 - نحطه بالصينيه ونضغط عليه باطراف الاصابع اهم شي نضغط عليه بقوه علشان يتماسك مع بعض

- نبداء بخلط الطبقه الثانيه ( الزبادي- السكر - الحليب المجفف ) ويكون قوامه مائي
واحيانا علي حسب نوعيه الزبادي بس غالبا يكون قوامه كذا
 
- وبعدين نصبه علي طبقة البسكوت المضغوط يصب بحذر علشان ما تخرب طبقه البسكوت يعني تصبينه شوي شوي 

7- ندخل الصينيه بالفرن الين ما تتماسك طبقة الزبادي يعني حوالي عشرين دقيقه وتختلف الدقايق من فرن للثاني يعني مو اكيد انها عشرين خليكم على ليما تتماسك طبقة الزبادي طبعا لمن تبين تعرفين تمساكت ولالا نغرس في الطبقه شوكه شوفوا حددت تجربتي للشوكة 
8-نبدا نرص الدوائر علي الوجه 

9- ونصلح الكراميل وطريقتة ( تحطين ظرفين الكراميل مع كاسين الماء الي ان يغلي وتخلينه دقيقتين وبعدين تطفين النار ) وتتركين الكريم كراميل الي ان يكون دافي وليس حاار انتبهي لان لو كان حار بيخرب بسكوت السمسم 
بعدها تصبين الكراميل علي طبقات الصينيه وتدخلينها الثلاجة الي ان تجمد طبقه الكريم كراميل واحلى شي تكون بارده بقووه  
وترارارااااا << الموسيقى الحماسية 
بعد ما برد ما احلااا

طبعا ما يحتاج اقولكم الطعممم كيف روووعه روعه روعه ما امل منه 
قطعتها مربعات وممكن بعد تقطعينها دوائر والتقديم علي حسب الرغبة
ممكن بدل دوائر السمسم تحطين ( اوريو ) تشيلين الكريمه الي بين قطع الاوريو وتصفينها بنفس الطريقه بيكون شكلها حلو
ممكن بدل الكريم كراميل تحطين جلي بالكرز او اي جلي انتي تحبينه 
ممكن تصلحينها بصينيه او بايركس دائري وتقدرين تفتحينها وتقديمنه كحلا للعشى 

مره من زمان صلحت هالحلا وغيرت بالطبقه الفوقيه صلحت كراميل وطريقته هي ( كوب سكر - نص كوب ماء -ملعقه فانيليا - نص علبة قشطه او قيمر تتركين السكر والماء الي ان يتغير لون السكر وتغطين القدر علشان البخار يذوب السكر الي باطراف القدر بعدين لمن يتغير لون السكر ويبدا يكون بني فاتح اضيفي له الفانليا والقشطه وانتبهي يحرقك ويطشر عليك وحركي بسرعه وانتباه علشان ما يتكتل الخليط وبعدين خلاص اطفي النار ) وتمتعي باحلى كراميل

 ان شاء الله عجبكم الحلا واتمنى تجربونه لان صدق حلوو وماياخذ وقت طويييل وانتي تحضرين له غير عن الطعم اللالييم 
احسه تشيز كيك مبسط << 
هذا كل شي لليووم بهالتدوينه ان شاء الله اشوووفكم بتدوينات ثانيه اكثر دساااامه وطعامه 
اي استفسار او اقتراح اكتبوا لي بالكومنت تحت وان شاء الله برد عليكم 
اتركم بحفظ الله 
 لاتنسون تتابعوني على

واذا اعجبتكم التدوينة انشروها

لاتنسون دعم المدونة بمتابعتها والاشتراك فيها من هنا 

مع السلامه  

ليست هناك تعليقات:

إرسال تعليق